Er du usikker på om elmålaren din måler rett?

Kven eig elmålaren din?

Elektrisitetsmålaren i heimen din eiges av nettselskapet. Det er dei som har ansvar for at målaren fungerer som han skal og i samsvar med forskrifta.

Korleis blir elmålarar kontrollerte?

Nettselskapet tek ut stikkprøver av målarar, som blir sende til eit akkreditert laboratorium for testing. Det er likevel liten sjanse for at nettopp din målar blir plukka ut, då det er eit lite utval. Dette utvalet representerer eit parti av elmålarane.

Justervesenet stiller strenge måletekniske krav til elmålarar og gjer derfor tilsyn med nettselskapa. Erfaringa er at målarane oppfører seg bra og det er veldig lite feil.

Kva gjer du viss du mistenkjer feil?

Viss du trur målaren din måler feil, kan du:

1. Sjekka merkinga på målaren. Alle samsvarsvurderte målarar har:

CE-merket
Bokstaven “M” saman med årstalet for vurderinga
Ein firesifra kode som viser kva for eit teknisk kontrollorgan som har sertifisert han

2. Be nettselskapet om ein kontroll.

Dei kan sjekka målaren for deg, men viss det ikkje blir oppdaga nokre feil, må du antakeleg dekke kostnaden sjølv.

Kort sagt:

• Elmålaren er eigd av nettselskapet.
• Den er sertifisert etter strenge krav.
• Nettselskapet tek ut stikkprøver av elmålarar til kontroll.
• Justervesenet fører tilsyn med nettselskapet.
• Ta kontakt dersom du har spørsmål.